VERANDERING VAN DIE VAN RABE NA RABIE       

Die vroegste verwysing na hierdie verandering word gemaak in die “Third Article, the History of the Nuy” wat ‘n versameling artikels uit die Worcester Standard was. “Hans Rabé and his wife settled on the banks of the Nuy in 1778-1779, and suffered much. It was on the suggestion of this lady who was for those days a lady of great literary attainments, that the name of the family Rabe who came from Leipzig was changed to Rabie. This was formally done with the assistance of their minister at Tulbagh (ds J. Kuys 1787 – 1794), to the satisfaction of those relatives who had trekked down country” (sic).

Die “lady” wat hierbo na verwys word is Susanna Catharina Cloete (*8-01-1758 †detail?) en die “relatives” is haar man Hans Rabe (*9-03-1755 † 1820) (X 25-04-1779) sy broer Jan Bastiaan (*3-5-1763 † 24-08-1835) wat na Graaff Reinet getrek het. Sy neef Jan Bastiaan (*7-10-1762 † detail?) wat na Swellendam getrek het en die van Rabe behou het.

Die eerste defnitiewe datum van die van verandering is opgeteken in die huweliksregister  NG Kerk Tulbagh toe Jan Bastiaan Rabie, van Graaff Reinet, op 11-4-1790 met Hendrina Helena van der Merwe op Tulbagh getroud is en hy sy van as Rabie aangeteken het.

Hul oudste seun, Chrtistiaan Jacobus Rabie (*10-10-1792 †22-11-1867), is die eerste baba wat op 25-11-1792 met die van Rabie gedoop is. By hierdie doop, in Graaff Reinet, was vier getuies. Jacobus van den Berg, Maria Susanna van der Merwe, Geertruy Grobbelaar (sy moeder), en sy suster Geertruy wat haar naam as Rabie geteken het.

Hans se seun, Johannes Christiaan (*26-6-1785 †1823), is as Rabé gedoop maar met sy huwelik met Alida Margaretha Moller, op 5-2-1809, het hy die van Rabie gebruik.

Die vroegste amptelike datum is dus 11 April 1790 hoewel die van Rabie moontlik reeds vanaf 1785 gebruik kon gewees het.